sab yaqin bech kar sab guman bech kar
main tawangar hun sud-o-ziyan bech kar

jhad gae meri shakhon se barg-o-samar
phir bahaaren kharidin khizan bech kar

ek naya aashiyana banaunga main
bar-lab-e-maikada ek makan bech kar

sab bikega yahan bekasi ke siwa
main abhi aa raha hun zaban bech kar

apne bachchon ki rozi kamata raha
wo adalat mein apna bayan bech kar

mujh kasafat-zada ne gulistan mein
ek naya ghar liya titliyan bech kar

muflisi ruh ki ab bhi pahle si hai
kya kamaya dil-e-naghma-khwan bech kar

'abdi' chup raha maslahat ke sabab
kaun khush hai yahan aastan bech kar