sada-e-dil bhi meri khamushi mein dub gai
bisat-e-shauq ye kis bebasi mein dub gai

khush-amdid ki khatir khule the lab goya
bade tapak se shabnam kali mein dub gai

latafaton ne jo dekha kasafaton ka khulus
to ruh-e-husn tan-e-ashiqi mein dub gai

wo zindagi jo panapti thi dil ki wusat mein
har ek shai ki musalsal kami mein dub gai

sahar ke rup mein 'rahi' wo phir bahaal hui
ghamon ki raat jo zinda-dili mein dub gai