sada-e-muzhda-e-la-taqnatu ke dhaare par
charagh jalte rahe aas ke minare par

ajib ism tha lab par ki panw uthte hi
main khud ko dekhta tha arsh ke kinare par

ajib umr thi sadiyon se rahan rakkhi hui
ajib sans thi chalti thi bas ishaare par

wo ek aankh kisi khwab ki tamanna mein
wo ek khwab ki rakkha hua sharare par

isi zamin ki jaanib palat ke aana tha
utar bhi jate agar hum kisi sitare par

mata-e-harf kahin be-asar nahin 'shahbaz'
ye kaenat bhi hai kun ke istiare par