sadgi pahchan jis ki khamushi aawaz hai
sochiye us aaine se kyun koi naraaz hai

be-sabab sayon ko apne lambe qad pe naz hai
khak mein mil jaenge ye sham ka aaghaz hai

yun hawa lahron pe kuchh tahrir karti hai magar
jhum kar bahta hai dariya ka yahi andaz hai

dekh kar shahin ko pinjre mein patinga kuchh kahe
jaanta wo bhi hai kis mein quwwat-e-parwaz hai

kyun mughanni ke liye bechain hai tu is qadar
ai dil-e-nadan ki tu to ek shikasta saz hai