sadkon pe bahut khalq-e-khuda dekhte rahna
kya chiz hai jine ki saza dekhte rahna

bah jaana khamoshi se kahin dard ka pani
aur dil ko sada khushk pada dekhte rahna

milne ke liye jaana use shauq se lekin
is rukh pe uda rang-e-wafa dekhte rahna

le jaana use bazm-e-nigaran mein wahan phir
kab aae nazar sab se juda dekhte rahna

mumkin hai ki mil jae kabhi koi ishaara
mausam ki ye be-mehr ada dekhte rahna

kamre mein pade rahna ghutan odh ke 'shahin'
diwaron pe taswir-e-hawa dekhte rahna