safar kathin hai main rahon se aashna bhi nahin
teri wafa ke siwa koi aasra bhi nahin

khuda se mangne baitha hun is pari-wash ko
mere nasib ki takhti pe jo likha bhi nahin

main jaanta hun use jaane kitni muddat se
ye aur baat ki us shakhs se mila bhi nahin

utha ke hath mohabbat ki bargahon mein
main sochta hun ki ab koi muddaa bhi nahin

qadam qadam teri rahon pe jugnuon ke charagh
rawish rawish meri qismat mein ek diya bhi nahin

hazar khwab sajae the apni raaton mein
khuli jo aankh to manzar koi raha bhi nahin