safha-e-qirtas par khush-rang tahriren nahin
apne qabze mein abhi lafzon ki jagiren nahin

zindagi hum ne guzari ek bewa ki tarah
khwab wo dekhe ki jin ki koi tabiren nahin

ji rahe hain shahar mein sab log andeshon ke sath
ek tere hi panw mein sochon ki zanjiren nahin

aur uchhlenge adab ke maskharon ke sar yahan
zang-aluda abhi sheron ki shamshiren nahin

mange tange par guzara kar rahe hain dosto
zindagi karne ki apne pas tadbiren nahin

chikh ki surat hayat-e-nau ka ek paigham hain
hum hawa ki lauh par be-jaan taswiren nahin

sar jhuka kar zulm sahna bhi sarasar zulm hai
bakhsh warna zulm ki kuchh aur tafsiren nahin