sahib-e-mehr-o-wafa arz-o-sama kyun chup hai
hum pe to waqt ke pahre hain khuda kyun chup hai

be-sabab gham mein sulagna meri aadat hi sahi
saz khamosh hai kyun shola-nawa kyun chup hai

phul to sahm gae dast-e-karam se dam-e-subh
gungunati hui aawara saba kyun chup hai

khatm hoga na kabhi silsila-e-ahl-e-wafa
soch ai dawar-e-maqtal ye faza kyun chup hai

mujh pe tari hai rah-e-ishq ki aasuda thakan
tujh pe kya guzri mere chand bata kyun chup hai

jaanne wale to sab jaan gae honge 'alim'
ek muddat se tera zehn-e-rasa kyun chup hai