said hun roz-e-azal se aalam-e-asbab ka
aur wa rakhta hun sine mein daricha khwab ka

samne aate hi us ke meri wahshat jag uthi
dhyan rahta tha mujhe yun to bahut aadab ka

kar-zar-e-ishq se bahar nikal kar dekhiye
sari basti mein ujala hai usi kamyab ka

aalam-e-ruya main dekha tha jase main ne kabhi
aks hai ab meri aankhon mein usi mehrab ka

aa gaya aakhir kitab-e-ishq ka anjam bhi
dur tak bikhra hua manzar hai pahle bab ka

sham hai aur surkh pedon ke dahakte sae bhi
nind mein bahta hua dhaara hai ju-e-ab ka

kis liye 'sajid' banata hun gharaunde ret ke
rukh badal sakta hai thodi der mein sailab ka