'sakhi' se chhut kar jaenge ghar aap
aji kuchh khair bhi hai hain kidhar aap

wo aashiq hain ki marne par hamare
karenge yaad hum ko umr bhar aap

pari samjhen pari, huren kahen hur
hue kis nur ke paida bashar aap

na aashiq hain zamane mein na mashuq
idhar hum rah gae hain aur udhar aap

dikhaenge hum apni laghari bhi
abhi to dekhiye apni kamar aap

mere nale agar sunne ka hai shauq
to sahab hath rakhiye kan par aap

rasai us ke zulfon tak na hogi
'sakhi' be-faeda maren na sar aap