salamat aae hain phir us ke kucha-o-dar se
na koi sang hi aaya na phul hi barse

main aagahi ke ajab mansabon pe faez hun
ki aap apna hi munkir hun apne andar se

na jaane kis ko ye eazaz-e-fan mila hoga
tamam shahr mein bikhre hue hain patthar se

ab is ke mauj-o-talatum mein dubne se na dar
guhar bhi tujh ko mile the usi samundar se

ye ehtimam-e-charaghan bhi kis kamal ka hai
diye jale hain to main bujh gaya hun andar se

ajab saman tha ki ab tak hain zakhm zakhm aankhen
main kor-chashm bhala aagahi ke manzar se