salim yaqin-e-azmat-e-sehr-e-khuda na tod
mayus ho ke kasa-e-dast-e-dua na tod

shiraaza-e-hayat bikhar jaega mera
ai sang-zad shisha-e-ahd-e-wafa na tod

kuchh aur hone de rah-e-manzil ko tez-gam
ai khizr tu abhi meri zanjir-e-pa na tod

teshe ki zarb sah nahin sakta har ek wajud
aazar har ek paikar-e-sang-e-ana na tod

chehre ki silwaton ka sabab aaina nahin
nachaargi-e-umr-e-rukh-e-aina na tod

is mutrib hayat mein zinda hai ragni
ruk mutriba abhi tu ye saz-e-sada na tod

bedar ho na jaen badan ki zaruraten
ai shauq-e-be-panah fasil-e-haya na tod

'salim'-shujaa maut ki hai aarzu haram
aaina-e-hayat ko yun be-khata na tod