samajh liya hai use tum ne apni zat ki had
wahi jo meri nazar mein thi kaenat ki had

hudud-e-wahm se aage guman ki had se pare
amiq bahr-e-yaqin hai rah-e-hayat ki had

nigah-e-husn bhi khira hui hain hairat se
bahut hasin hai zauq-e-jamaliyat ki had

chhupa rakha hai safedi ko apne daman mein
siyah kitni hai apne tasawwuraat ki had

nuqush-e-karb ubharne lage hain chehre par
use samet rahi hai gham-e-hayat ki had

zamin se auj-e-falak tak safar kiya hai abas
pahunch se dur hai un ki nawazishat ki had

wafa ke shahr ki 'jami' talash hai sab ko
kisi se sar na hui garche khwahishat ki had