tarikiyon ka sang har ek rahguzar mein rakh
phir azm ka charagh meri chashm-e-tar mein rakh

lene de jaeza use khud apni ruh ka
tu fikr-o-fan ka nur niga-e-bashar mein rakh

lamhon ki udti gard jahan dhund le panah
kuchh aisa naqsh waqt ke diwar-o-dar mein rakh

daman ko raat bhar mein siyahi se bhar liya
yaadon ki dhund ko zara dast-e-sahar mein rakh

logon ki sang-bar nigahen na tod den
chehra hai kanch ka ise patthar ke ghar mein rakh

hai shor-o-ghul mein raunaq-e-bazm-e-tarab nihan
khamoshiyon ke bahr ko tu apne ghar mein rakh