samajh sake jo meri baat wo kalam kare
nahin samajhta to bas dur se salam kare

jise bhi chahiye khairaat mein meri aawaz
wo pahle meri khamoshi ka ehtiram kare

kiwad khulte hi warna badan se liptegi
use kaho ki udasi ka intizam kare

muamlat jahan us ke waste chhode
aur ek wo hai jo fursat se apne kaam kare

mujhe sukun hi wo aawaz sun ke aata hai
to kyon na rabt-e-musalsal wo mere nam kare