tajdid zindagi ke ishaare hue to hain
kuchh pal sahi wo aaj hamare hue to hain

mana nasib ho na saka koi aaftab
raaton mein meri chand sitare hue to hain

be-shak haqiqaton se bahut dur hai magar
be-shak yahi sarab sahaare hue to hain

chhuta nahin hai daman-e-ummid ab talak
hum bhi ai dost waqt ke mare hue to hain

ye aur baat hum hi na mahzuz ho sake
khush-rang zindagi ke nazare hue to hain