samea lazzat-e-bayan-zada
zehn o dil sehr-e-dastan-zada

fikr o tahqiq rehn-e-mohr-o-sanad
talib-e-ilm imtihan-zada

zat ki fikr hai qayas-alud
zindagi ka yaqin guman-zada

raat pahchan de gai sab ko
subh chehre mile nishan-zada

tak mein hai na ki taaqub mein
tu shikari hai par machan-zada

un ki fikr-e-rasa falak-paima
apni sochen hain aasaman-zada

khud se rishte nahin rahe lekin
log ab bhi hain khandan-zada

raat hai log ghar mein baithe hain
daftar-aluda o dukan-zada