san kar bayan-e-dard kaleja dahal na jae
duniya se dar rahe the ki duniya badal na jae

har mahfil-e-nashat se phirta hun dur dur
kya ehtiyat hai ki tera gham bahal na jae

to aaj tak to hai meri nazron mein hu-ba-hu
duniya badal gai teri surat badal na jae

hain taq-e-arzu pe khilaune saje hue
mayus aarzu ki tabiat machal na jae

tishna-labi kahin mujhe gharqab kar na de
thodi si raushni ke liye ghar hi jal na jae

ek khauf hai ki manzil-e-nisyan qarib hai
tu wadi-e-khayal se aage nikal na jae

roun kahan ki rahat-e-khalwat nahin hai 'shaz'
hansne pe bhi ye shart ki aansu nikal na jae