sans tak aata nahin ye haal hai
ishq kya hai jaan ka janjal hai

fitna-e-mahshar tumhaari chaal hai
har qadam par dil mera pamal hai

hijr mein kis tarah aaega qarar
jab tumhaare samne ye haal hai

wo hamare pas kyon aane lage
nama-bar ki is mein koi chaal hai

ishq ki jo kuchh saza ho dijiye
hum ko apne jurm ka iqbaal hai

jis mein phans kar koi chhuta hi nahin
wo tumhaare gesuon ka jal hai

tu bhi zahid un ko dekhe to kahe
kya jawani kya ada kya chaal hai

marsiya hai ye dil-e-marhum ka
ya hamara nama-e-amal hai

aaj se diwana hai 'hajir' koi
ek muddat se pareshan-haal hai