sans zanjir ki manind saza ki gai hai
yani hijrat meri qismat mein rawa ki gai hai

main kisi zulm pe khamosh nahin rah sakta
ye baghawat mujhe wirse mein ata ki gai hai

ain-mumkin hai mere dost main bakhsha jaun
aaj mere liye masjid mein dua ki gai hai

baad-az karb-o-bala lafz ke mani badle
ism-e-abbas se tafsir-e-wafa ki gai hai

is liye mani ujale ki alamat hai 'suhaib'
raushni lafz ki aankhon mein fana ki gai hai