saqi-e-bazm-e-tarab se mai-kade se jam se
kaam rakkha hai hamesha hum ne apne kaam se

ho ke dil-bardashta utthe hain bazm-e-am se
ab chale aaenge ai qasid wo mere nam se

shaikh ji ab mai-kade mein pak-bazi ka sawal
puchh lenge hum tumhaare jama-e-ehram se

qaidi-e-zindan-e-gham hain hum jahan-e-zist mein
bhag jaana hai nikal kar aalam-e-ajsam se

hum ne ab samjha hai aakar bazm-e-hasti ka fareb
rah gae hain jab lipat kar daman-e-auham se

meri tab-e-did ki ek aazmaish ke liye
aaj to jalwon ki barish ho rahi hai baam se

kya bataun kaise kaise mujh pe dhae hain sitam
gardish-e-qismat ne mil kar gardish-e-ayyam se

hum to ai 'khushtar' samajhte hain ki mar kar ji uthe
maut ne hum ko chhudaya zist ke aalam se