sar-e-waraq pe likha intiqam hai shayad
isi bayaz mein mera bhi nam hai shayad

kaha jo main ne ki kuchh ehtijaj hai barpa
to bole zill-e-ilahi awam hai shayad

uthe jo hath dua ko badal gae manzar
khuda se mera yaqin ham-kalam hai shayad

main aaun tum ko na dekhun to phir palat jaun
tumhaari samt se ye intizam hai shayad

ye aab-o-gil ye shajar aasman ye suraj
kisi ke aane ka ye ehtimam hai shayad

jami hui hai nazar aaj tum pe saqi ki
tumhaare hisse ka gardish mein jam hai shayad

namaz-e-fazr mein masjid mein kyun hai sannata
namazi koi nahin bas imam hai shayad