sar mein sauda-e-wafa rakhte hain
hum bhi is ahd mein kya rakhte hain

wasta jis ka tere gham se na ho
hum wo har kaam utha rakhte hain

bin khili ek kali pahlu mein
hum bhi ai baad-e-saba rakhte hain

but-kade walo tumhein kuchh bolo
wo to chup hain jo khuda rakhte hain

ghairat-e-ishq koi rah nikal
zulm wo sab pe rawa rakhte hain

kya saliqa hai sitamgari ka
rukh pe daman-e-haya rakhte hain

chaara-sazan-e-zamana ai dil
zahar dete hain dawa rakhte hain

naghma-e-shauq ho ya nala-e-dil
dard-mandana sada rakhte hain

dil ki tamir ko dha kar 'akhtar'
wo mohabbat ki bina rakhte hain