sar-nigun mausam-e-bahaar mein hai
ye shajar kis ke intizar mein hai

tab-e-nazzara aankh ko bhi nahin
dil bhi kab apne ikhtiyar mein hai

zist ho baat ho ki majlis ho
lutf gar hai to ikhtisar mein hai

wo bas ek bar chhu ke guzre the
ruh tak lams ke khumar mein hai

kaisa ulta safar hai jiwan ka
ye chadhaw kisi utar mein hai

zist karne mein lutf kya dhundhen
kya maza waqt-e-mustaar mein hai

baat kuchh to ajib hai ab ke
kaisi talkhi mizaj-e-yar mein hai