sarab-e-zoam mein tha aasman pakadte hue
zamin pe tifl gira hai dhuan pakadte hue

saron pe tan gai dhup phir se tez hua
rawa-rawi mein kai saeban pakadte hue

faraaz-e-arsh se ek tutte sitare ne
kiya ghubar mujhe kahkashan pakadte hue

hadaf-shanas hua to ye waqia bhi hua
wo tir tod raha tha kaman pakadte hue

koi to rang hai mauj-e-sarab mein bhi ki main
yaqin chhod raha hun guman pakadte hue

ba-zoam-e-naz ku-e-be-kasi mein aa pahuncha
ba-sad niyaz dar-e-dostan pakadte hue

junun-e-shauq mein kante bhi phul lagne lage
main zakhm zakhm hua titliyan pakadte hue

ab is madad se to achchha hai dub jaun main
wo dar raha hai meri ungliyan pakadte hue

gilas toda gaya jis ada se is dil ka
mujhe ghurur sa hai kirchiyan pakadte hue