sard pad jae khun pani na ho
meri tahzib zafrani na ho

ungliyan aap ki lahu mera
kaise tahrir jawedani na ho

khatm karna ho ek talluq bhi
aur diwar bhi uthani na ho

kah rahi hain wo khush-sukhan aankhen
ab koi baat bhi zabani na ho

jis tarah tum ne ikhtitam kiya
khatm aise koi kahani na ho

nafraton ka ilaj mumkin hai
gar ye bimari khandani na ho

hum kabhi dil kabhi nazar mein rahen
la-makani ho be-makani na ho

wo juda ho ke hai malul bahut
ye kahin teri khush-gumani na ho