sari bazm-e-talab tumhaari hai
din tumhaara hai shab tumhaari hai

shakh-e-jaan pe ye pyar ki shabnam
pahle meri thi ab tumhaari hai

meri sanson mein wasl ki khushbu
jitni hai sab ki sab tumhaari hai

ye jo ek be-khudi ka dariya hai
is mein mauj-e-tarab tumhaari hai

sochti hun ki ye badan ki mahak
kab nahin aur kab tumhaari hai

nashsha-e-chashm-o-lab tumhaara hai
shakh-e-bint-e-inab tumhaari hai

raushni mahtab se badh kar
dil mein shah-e-arab tumhaari hai

tum ne socha hai ye kabhi 'afroz'
zindagi be-sabab tumhaari hai