sari duniya se dosti kar li
yun basar hum ne zindagi kar li

jis qadar jis kisi ne khwahish ki
us qadar aap hi kami kar li

aur to bas nahin chala apna
apne hisse mein bebasi kar li

jaisa jis ne banaya ban baithe
shakl jaisi bhi jo mili kar li

jhute aansu bahana sikh liya
muskurahat bhi kaghazi kar li

aise aasan kar liya khud ko
ek mushkil pe dusri kar li

tum to dariya-mizaj the 'babar'
tum ne phir kaise khud-kushi kar li