sarir-e-khama se tashrih-e-sirr-e-zi hogi
faza-e-sher mein iqlim-e-agahi hogi

jise karam se tere bakht-e-na-rasa na mila
use nasib haqiqat mein kya khushi hogi

faza-e-tira ki uqda-kusha hai jo tanwir
khulus-e-dil ki wo pur-kar sadgi hogi

riyaz-e-mani ki jis se faza hai rakhshanda
alam-nasib ke dil ki wo shaeri hogi

haram ke khak-nashinon se be-adab ijad
wufur-e-dard se paida qalandari hogi

lahu se dil ke charaghan karo khuda-khana
tadap jo ruh mein hogi to bandagi hogi

harim-e-naz ko surat-parast kya jaane
ada-shanas faqat dil ki be-khudi hogi