sath mehr-o-khulus-o-ulfat hai
mere aslaf ki amanat hai

ek ek lamha besh-qimat hai
sirf ehsas ki zarurat hai

betiyon ka wajud rahmat hai
man ke qadmon ke niche jannat hai

dali dali khizan-rasida hai
be samar nakhl-e-adamiyyat hai

ek jaanib tazad-e-qaul-o-amal
ek taraf mansab-e-shahadat hai

har zamana mera wajud-shanas
har sadi par meri hukumat hai

muttahid ho to sans loge phir
tafraqa zahr hai halakat hai

tum jo 'hanafi' khuda ko bhul gae
bas usi ka wabaal zillat hai