saz-e-ulfat hai mere saz-e-jigar hone tak
husn dilkash hai mere zauq-e-nazar hone tak

azm-e-insan ne sitaron pe kamanden dalin
manzilen dur hain sargarm-e-safar hone tak

barha nanha sa dil khun hua zer-e-falak
ghunche par guzri hai kya kya gul-e-tar hone tak

rifaten kaun si hai chhu na sake jin ko khayal
had-e-parwaz hai takhil ke par hone tak

zindagi talkh haqiqat hai ki ek khwab-e-hasin
kaun samjha hai ise umr basar hone tak

kar gai tujh ko pareshan meri aashufta-sari
ye yaqin tha na teri aankh ke tar hone tak

hum sar-e-sham jalate hain tasawwur ke charagh
kaun dekhega teri rah sahar hone tak

tere wade kabhi sharminda-e-ifa na hue
warna jita tere aane ki khabar hone tak

wada be-kaif hai be-rang hai gulzar 'habib'
dil hai suna sa teri lutf-e-nazar hone tak