shab-e-furqat ki tariki mein shamil hai ghubar apna
isi sahra mein khoya ishq ne ahd-e-bahaar apna

mita gulshan to uth kar khak-e-gul se hum kahan jate
jahan gulshan tha pahle ab wahin par hai mazar apna

tere jalwon mein gum hon ya teri furqat mein mit jaen
ye hum samjhe hue hain hai fana anjam-e-kar apna

hujum-e-yas mein beganagi ka shikwa kis se ho
na hum apne na dil apna na jaan apni na bar apna

kahan ab wo surur-e-daur-e-awwal bazm-e-hasti mein
jise kahte hain duniya hai wo ai 'maikash' khumar apna