shab ki aaghosh mein mahtab utara us ne
meri aankhon mein koi khwab utara us ne

silsila tuta nahin mom-sifat logon ka
pattharon mein dil-e-betab utara us ne

hum samajhte the ki ab koi na aaega yahan
dil ke sahra mein bhi asbab utara us ne

bazm mein khub lutae gae chahat ke gulab
is tarah sadqa-e-ahbab utara us ne

aansuon se kabhi sairab na hota sahra
mere andar koi sailab utara us ne