shabab aaya tadapne aur tadpane ka waqt aaya
agar sach puchhiye be-maut mar jaane ka waqt aaya

abhi ji bhar ke pi lo phir na jaane kis pe kya guzre
qarib ab shaikh-ji ke waz farmane ka waqt aaya

unhen pas-e-haya thahra to apne panw larzan hain
hamari juraton ka un ke sharmane ka waqt aaya

ghata chhai barasne ko hain bunden abr-e-nisan se
nahin pite jo nadan un ko samjhane ka waqt aaya

na ho jae kahin phir aap se tum tum se tu 'azam'
hudud-e-aql se bahar nikal jaane ka waqt aaya