shahar pe chhai hui khatra-e-yalghaar ki raat
zeb-e-tarikh rahegi karam-e-yar ki raat

shukriya tum ko raha pas-e-hijab-e-jaanan
ai shab-e-kucha-o-barzan dar-o-diwar ki raat

dhup mein kucha-nawardi nahin jin ka maslak
un pe nazil na hui gesu-e-khamdar ki raat

main ne dekhe hain wahan kitne nizam-e-shamsi
din ko kis tarah kahun anjuman-e-yar ki raat

chhu na paenge wo resham se mulaem gesu
sakht lagti hai jinhen wada-e-dil-dar ki raat

shart hai dusre aalam mein rasai warna
raat zahid ki wahi hai jo qadah-khwar ki raat

qabil-e-rashk hai ai dost hayat-e-'mani'
teri yaadon ka shabina kabhi afkar ki raat