shahr ka shahr hua jaan ka pyasa kaisa
sans leta hai mere samne sahra kaisa

mere ehsas mein ye aag bhari hai kis ne
raqs karta hai meri ruh mein shola kaisa

teri parchhain hun nadan judai kaisi
meri aankhon mein phira khauf ka saya kaisa

apni aankhon pe tujhe itna bharosa kyun hai
tere bimar chale tu hai masiha kaisa

ye nahin yaad ki pahchan hamari kya hai
ek tamashe ke liye swang rachaya kaisa

mat phiri thi ki harifana chale duniya se
sochte khak ki mawwaj hai dariya kaisa

subh tak raat ki zanjir pighal jaegi
log pagal hain sitaron se ulajhna kaisa

dil hi ayyar hai be-wajh dhadak uthta hai
warna afsurda hawaon mein bulawa kaisa

aaj khamosh hain hangama uthane wale
hum nahin hain to karachi hua tanha kaisa