shahr ka shahr jaanta hai mujhe
shahr ke shahr se gila hai mujhe

mera bas ek hi thikana hai
main kahan jaunga pata hai mujhe

raushni mein kahin ugal dega
mera saya nigal gaya hai mujhe

ban gaya hun gunah ki taswir
koi chhup chhup ke dekhta hai mujhe

raste bhi to so gae honge
apne bistar pe jagna hai mujhe

us ki baaten samajh raha hun main
wo bhi lafzon mein taulta hai mujhe

ye natija hai aagahi ka 'shakil'
aaj kal ek junun sa hai mujhe