shahr ke shahr basate hue mar jate hain
kar-e-duniya ko chalate hue mar jate hain

log bichhden to basa lete hain duniya phir se
hum to bas hath chhudate hue mar jate hain

jab se tu rah ki diwar samajhta hai hamein
hum teri rah mein aate hue mar jate hain

chand chehron ke liye did bacha rakkhi thi
ab to hum palken bichhate hue mar jate hain

jo tere nam se ashaar kahe the hum ne
hum wo ashaar sunate hue mar jate hain

wo samajhte hain ki hum aankhon mein gum hain 'bushra'
un se hum nazren milate hue mar jate hain