shahr sab hadson ki zad mein tha
raat din sanehon ki zad mein tha

aks-dar-aks bat gaya tha wajud
is qadar aainon ki zad mein tha

manzilon ka suragh kya pate
ki safar raston ki zad mein tha

ruh ke zakhm hi na the nasur
jism bhi kirchiyon ki zad mein tha

go tha mukhtar-e-kul magar insan
kitni majburiyon ki zad mein tha

ek insan hazar paimane
aadmi falsafon ki zad mein tha

sar pe ek saeban tha bosida
aur ghar barishon ki zad mein tha