shaikh ke ghar ke samne aab-e-haram dal dun
jam-o-subu ki aag mein apna kalam dal dun

shahr ke is hujum mein jine ka hausla rakhun
apne junun ki aag mein shahr ki sham dal dun

subh se kuchh ajib gham dasht mein hain hamare sath
in ke saron pe main zara chadar-e-sham dal dun

bistar-e-marg par mujhe jine ke khwab de gae
jaun unhi ke samne un ka kalam dal dun

aaj shab-e-visal hai dekhenge aap hijr bhi
aag jala ke ishq ki is mein dawam dal dun