shair hue to kya hue 'ehsan' hi rahe
'mirza'-o-'mir' ban na sake khan hi rahe

imkan ke daere ko jo wusat na de sake
apne hudud-e-zat ka irfan hi rahe

jab dil ho muztarib to kahan tak khudi ki laj
ai naz-e-husn aaj teri aan hi rahe

aahat kisi ke panw ki aai na subh tak
hum dil ki dhadkanon ke nigahban hi rahe

pahuncha na dast-e-shauq jo daman-e-yar tak
be-shaghl kyon ho apna gareban hi rahe

hai iltija-e-shauq mein bhi tantana wahi
'ehsan' ishq karke bhi 'ehsan' hi rahe