shajar aaram-dah hone lage hain
parinde raat-din sone lage hain

ye kaisa saneha ab ke hua hai
sabhi chhote bade rone lage hain

mohabbat banjh dharti ban gai hai
badan ab be-samar hone lage hain

is ahd-e-narawa ke ahl-e-danish
kabhi thigne kabhi baune lage hain

sadaen be-sada alfaz banjar
qalam viran se hone lage hain

bahi-khwahon ko khush rakhne ki khatir
hum apne aap pe rone lage hain