sham-e-dilkash ka rangin saman hai
aise mein kya khabar tu kahan hai

apne dil ko jawan-sal rakkho
dil jawan hai to sab kuchh jawan hai

jam chhalka diya kya shafaq ne
charkh par mai-kade ka guman hai

kab se khoti hui us ki manzil
kaun se mod par karwan hai

jazba-e-dosti ko sada do
dost se dost phir bad-guman hai

mit gain jabki aqdar-e-insan
kaun insan ka pasban hai

ho gaya kya bahaaron ko yaro
har taraf ab khizan hi khizan hai

chhin na jae mataa-e-mohabbat
phir siyasat ka fitna jawan hai

apni rudad-e-ulfat kahen kya
jo haqiqat thi ab dastan hai

jo ghazal hi ka hai sirf hissa
nazm mein wo balaghat kahan hai

shaeri to bahar-haal yaro
zat-o-mahaul ki tarjuman hai

kaamyab is mein hote hain kam hi
zindagi ek kada imtihan hai

kya chaman hai ye 'maghmum' jis mein
aatish-e-gul ke badle dhuan hai