sham-e-ghurbat jo sar-e-subh-e-watan tutti hai
dekh ke tujh ko nigahon ki thakan tutti hai

hansta rahta hun ki chhup jaen tere gham ke nuqush
khanda-e-lab se jabinon ki shikan tutti hai

pa-ba-jaulan rah-e-pur-khar pe chalne walon
koi din aur ki kanton ki chubhan tutti hai

ishq-e-sani mein hai mashuq-e-guzishta ka khayal
waslat-e-nau pas-e-hijran-e-kuhan tutti hai

guftugu lams bhi karta hai sar-e-khalwat-e-shab
khamushi bar-sar-e-mizrab-e-badan tutti hai