shayad rukh-e-hayat se sarke naqab aur
bhar do mere subu mein sharab-e-gulab aur

hogi mere subu se numud-e-hazar-subh
ubhrenge is ufuq se abhi aaftab aur

aati hai ku-e-dar-o-rasan se sada hanuz
aae idhar jo hai koi khana-kharab aur

makhmur-e-bu-e-zulf na aaenge hosh mein
chhidke abhi nasim-e-bahaaran gulab aur

ai warisan-e-satwat-parwez hoshiyar
daman-e-waqt mein hain abhi inqalab aur

aai 'zafar' jo raat zaban par hadis-e-dost
nagah badh gai mere jauhar ki aab aur