shikayat-e-gham-e-lail-o-nahaar kaise karun
main khud ko apni nigahon mein khar kaise karun

ye zindagi badi neamat hai manta hun magar
ye be-wafa nahin ye eatibar kaise karun

tujhe hai naz jafa par mujhe wafa ki talab
main apni zat mein tera shumar kaise karun

kahin bahaar ke aasar to nazar aaen
gareban apna abhi tar tar kaise karun

qadam qadam pe yahan nafraton ke dere hain
faza-e-sahn-e-chaman khush-gawar kaise karun

abhi to dil ko nae ranj-o-gham ki khwahish hai
ai zindagi main tujhe lala-zar kaise karun

wo be-wafai ka ehsas kar ke 'nadim' hai
masarraton se use ham-kanar kaise karun