shikayat-e-sitam-e-rozgar karta hun
khizan ke daur mein zikr-e-bahaar karta hun

hazar rang se tu de raha hai mujh ko fareb
magar main phir bhi tera eatibar karta hun

chaman se mujh ko bas ab is qadar talluq hai
khayal-e-amad-e-fasl-e-bahaar karta hun

na raaz fash ho mera tasawwur-e-jaanan
main dard-o-gham ka tujhe raaz-dar karta hun

sahar qarib hai tare bhi jhilmilate hain
ab aa bhi ja ki tera intizar karta hun