umr bhar ki koshish-e-nakaam par hansta hun main
us ke har aaghaz har anjam par hansta hun main

ye bhi gardish mein hai saqi meri qismat ki tarah
tere maikhane mein daur-e-jam par hansta hun main

shadmani wasl ki ho ya ho furqat ka alam
jo bhi mil jae usi inam par hansta hun main

tohmaten mujh par hain kitni ai jamal-e-ru-e-dost
aur mera dil ki har ilzam par hansta hun main

din to kat jata hai 'akhtar' panw ke chakkar ke sath
jo na pahunche subh tak us sham par hansta hun main