shikayaten na zamin se na aasman se hain
ki ek umr se hum log be-zaban se hain

na ho jo shahar ki manind bud-o-bash nahin
yahi bahut hai ki sahra mein hum aman se hain

meri tarah hadaf-e-ahd be-yaqini hain
khud apne-ap se jo log bad-guman se hain

ajib hain tere kuche mein basne wale bhi
zamin pe rahte hain wabasta aasman se hain

visal-o-hijr ki ye tohmaten sahen kab tak
hum ahl-e-ishq ki bezar apni jaan se hain

ye moajiza bhi ajab hai tere talluq ka
jo log dushman-e-jaan the wo mehrban se hain

suluk-e-ahl-e-jahan dil pe naqsh hai 'khawar'
jahan the zakhm wahan aaj bhi nishan se hain