shoala-sifat wo aag ugalta dikhai de
mera wajud mujh ko pighalta dikhai de

kis ko sharik-e-rah karen ham-safar kahen
har ek rafiq rah badalta dikhai de

mayusiyon ke tapte hue reg-zar mein
panw har ek khayal ka jalta dikhai de

ye waqt sazgar kisi ke liye nahin
har shakhs ab to hath ko malta dikhai de

ab teri meri rah mein nafrat ki kai hai
kaise chalun ki panw phisalta dikhai de

ab ai 'matin' dost ki dushman ki kya tamiz
jis se milo wo zahr ugalta dikhai de